星期一本欄提及「俊和發展集團致函港大、中大、科大等，要撤回捐出嚟嘅獎學金」，銀碼原來好細，不少打工仔工程師都捐得起，成為笑柄。不過從宣傳角度嚟講，好嘢呀，試問在建築（建造）業之外，有幾多個香港人，幾多個大學生識得「俊和」是乜東東芫茜葱？依家就唔同呢，新聞見報之後，幾多人知道俊和係一間乜嘢公司呀，此外，又可以借題發揮反佔中，中聯辦在後面拍晒手掌，統戰功勞簿上必定記上俊和總裁彭一邦公子一功，以後與中資合作，如魚得水，區區幾萬元獎學金，一個報紙頭版廣告都買唔到，宜家得到嘅曝光回報率，起碼值幾十萬元廣告費。
投資V睇完左丁山所寫，來電告知：「彭公子好嘢，不愧為美國精英教育產品，美國影響力無處不在，佔中爭民主，反佔中要求安定做生意嘅，都受美國思想影響，難怪北京陰謀理論家恨美國恨到牙癢癢。」左丁山問：「你講乜嘢呀？」投資V話：「你唔知咩，彭公子唔係在香港受港英奴化教育㗎，佢一早就去咗麻省大大有名嘅Deerfield，之後入咗邊間大學我唔知，但Deerfield嘅學生多數係入長春藤嘅嘞，羅范椒芬個女就係Deerfield校友，賓架黎個女亦然，我嘅仔都係。彭公子滿腦子係在美國高級教育，東岸高貴人物人文氣氛之下成長嘅，應該好波過香港大學啩，傳媒不如搵彭公子與港大學生周永康辯論吓，睇清楚本地薑教育是否差過美國教育精英？」
又係幾好建議噃，不過周彭兩位左丁山都唔識，或者一啲德高望重嘅人物可以做中介橋樑！
Deerfield大名鼎鼎，不少中東皇族子孫入讀，有稱係中國首富或「首善」嘅陳光標嘅公子又係入咗Deerfield，呢間寄宿學校嘅教育宗旨係乜嘢呢？好奇之下，上網睇吓Deerfield Academy網頁，呢間學校於1797年成立，至今已有217年，歷史悠久到極，有一萬個校友（名人有克利夫蘭總統，約旦王鴨都拿），現有六百名學生，每班平均有十二個學生，全校有一百二十名教師，2012/13年度學宿費高達五萬二千美元，貴過讀好多大學。呢間學校鼓勵開放思想，社會服務，從體育運動學習群體合作，彭公子在此校畢業，依家睇唔順眼港大、中大、科大學生嘅佔中行為，撤回獎學金，唔會自Deerfield學番嚟嘅嗎？