經常被網民恥笑嘅無綫膠劇，連新界原居民都辣㷫埋。身兼元朗十八鄉委會主席嘅新界傳統權益委員會主任委員梁福元，原來去信通訊事務管理局，投訴無綫喺上月16號播出嘅劇集《使徒行者》講及丁權時，完全扭曲原居民家庭倫理同社會價值，有醜化新界原居民之嫌。
梁福元話呀，平日無追開無綫劇，但上述劇集出街後收到唔少村民投訴，話劇中描繪一宗爭奪撫養權官司時，講到有個細路仔有丁權，只要攞到個細路仔撫養權嘅家長，就可以出售丁權圖利。梁福元澄清，其實父母即使攞咗撫養權，都無可能轉售細路嘅丁權，鬧無綫錯到離晒譜，下次有關丁權嘅劇情，應該諮詢吓佢先出街。而平日有唔少金句嘅鄉議局主席發叔，嚟緊會出版「劉皇發言論集」，收錄出任主席30年來金句。