【本報訊】有人斥「佔中」癱瘓交通、破壞香港經濟，但佔領區的店主卻認為，令市民卻步的並非交通不便或集會帶來的混亂場面，而是現時正值香港社運重要時刻，社會上瀰漫着一片為民主公義抗爭的肅然，令習慣安逸的港人暫且放下個人享樂，走上街頭為未來鋪路，消費情緒自然受影響。所以開不開路還是次要，政府如何回應民主訴求才是重點。
「照常買嘢更不安」
銅鑼灣地帶的一街之隔，便是佔領區。這邊廂學生、市民築帳篷而睡，另一邊也有人繼續生活。
「EARTH.er」是銅鑼灣地帶內的店舖，店主Benny因雨傘運動損失一半生意，因入不敷支，連自己都無糧出，但仍感到開心，「好多客人都支持學運，如果社會發生咁大件事，佢哋照常買嘢，對我嚟講更不安」。
警方施放催淚彈後，Benny亦響應罷市一星期，落金鐘佔領區席地而睡，以行動支持學生，「有損失、犧牲係好重要嘅表態，希望政府可以真正面對佢哋嘅問題」。
Benny透露並非首次中催淚彈，上一次是2005年韓農反世貿示威一役他也有聲援，「嗰次韓農都幾可怕，一個鐵馬，將鐵枝抽出嚟逐條派，好有組織，危險程度比今次高好多」。
Benny熱衷社運，十年前開始參與七一遊行、六四晚會，希望有一天政府可還政於民，還市民一個公義制度，「唔係因為有勝算而去抗爭，係因為無勝算但仍然覺得佢係必須，所以先去抗爭」。
銅鑼灣是佔領區之中最少人留守，不時被議論是否該撤退以集中火力，但Benny指佔領區缺一不可，「政府都無為我哋讓過步，點解我哋要讓？如果銅鑼灣嘅人真係撤咗，會被政府有藉口話佢哋都知自己阻住人，咁就更有理由清旺角同其他地方」。