好多人話世事無常，絕對係啱嘅。好似聯交所前副總裁許浩明，今年2月23日仲好開心咁拉頭馬，當日佢嘅愛駒「甜城效應」勝出一場沙田1400米，過終點前許浩明中氣十足，嗌馬嗌到拆天，跑完仲與佢嘅好友「劍飛聲」女馬主葉思貝相擁慶祝，令大家感覺許浩明鴻運當頭；殊不知半年後八月尾，佢就因病辭世，享年只 56歲，喺現代人眼中，可以話英年早逝。
雖然人走咗，但世界仍繼續轉，許浩明一對現役馬「甜城效應」同「極速」，亦繼續為爭勝而活，許家嘅人亦係時候放下哀傷向前看。其中「甜城效應」會喺今期夜賽上陣，隻馬上季已經顯示過實力，最近亦積極備戰，9月下旬泥閘表現無疑一般，但省過該課後，本月10日晚試谷草1200米大閘，狀態明顯大有進展，守好位之下，末段擒下比佢高20分嘅「卡加動力」，既有速度又有後勁，為今次初跑谷草1200米做好準備。許浩明已經身在天堂，相信佢睇到愛駒贏馬，都會感到安慰。