一班男、女拔萃嘅學生同舊生，日前打算喺南華早報刊登聯署聲明，要求警方調查警員毆打示威者事件、政府正視真普選訴求。
南早最初以為呢個係與教育相關嘅廣告（advertisement），所以開價5萬；及後發現原來係一份公告聲明（notice），就加至15萬，發起人Andrew隨即大鬧南早政治審查。
南早回應話呀，事件冇政治考慮，廣告同公告一向都唔同價，客戶已獲即時通知，但承認可以處理得好啲。
成班南早記者則好㷫，話根本唔應該廣告部嘅決定等同編輯部決定，又話事件令到好多示威者拒絕受訪，Andrew知道禍及無辜後，喺自己fb向南早記者耍冧。