因為反佔中而遭香港人罷食嘅「喜記避風塘炒辣蟹」，老闆廖偉文早前仲被指趁亂非禮女人。廖偉文噚日出席張融嘅「苦主申訴平台」記者會，控訴佔中至今冇咗80萬生意，對佢哋呢啲「中小企」好大損失，八方唔知咁樣係咪代表，由佔中人士發起嘅罷食喜記行動已經收到預期效果？只知廖偉文要求惡搞嘅市民唔好再打電話騷擾喜記、亦唔好再喺喜記嘅facebook寫粗言穢語。
查實廖偉文講嘢唔多叻，反而喺佢身邊嘅張融不停做引導，包括問佢係咪自覺因為勇敢反佔中而成眾矢之的？但廖偉文竟然冇和應，只稱「我哋唔知，我哋做番小商戶，搵錢養家……只希望盡快回復正常生活」。