政府同學聯對話之日，天主教榮休主教陳日君樞機亦好關心，喺博客寫咗篇「我怎能不擔心」嘅文章，提醒學生要知道對話背後嘅對手係中共，「你們不知道今天的政府是誰的爪牙嗎？你們是他們的對手嗎？」樞機話一直參與佔中，卻冇機會參加冇咗三子嘅對話，不滿政府想蝦「小朋友」，又話政府如果唔承認政改報告誤導中央、唔重啟政改諮詢，對話就係廢話！
查實樞機去咗梵蒂岡參加大禮彌撒，原本諗住教宗方濟各未必有機會同佢講到嘢，點知教宗見到佢即刻大聲笑住話：「啊！啊！這就是用『投石器』去打仗的那位。」樞機相信，教宗想用達味用投石戰勝巨人哥肋雅嘅聖經故事，鼓勵年輕人唔使怕，因為天主會助佑佢哋戰勝巨人。