記唔記得季初呢場賽事呢？「獵豹小子」直路雖然後追甚勁，但最終只得一席全無威脅嘅季軍。又記唔記得呢場呀？今個月中「喜盈門」喺直路賽狂放，埋門有啲腳仔軟，又係跑第三收場。
原來上述兩場賽事，已經係華將湯智傑今季嘅最佳成績，其餘39匹座騎全部三甲不入，即係話佢今季既未贏過馬，亦未入過Q。吓，咁慘情，湯仔豈不是食穀種？你咁諗就大錯特錯喇，9月中開鑼至今一個月，湯仔策騎費收入41,000元，七次跑入三至五名，個人獎金夾埋有31,000元左右，即一個月總收入 72,000元，寫字樓經理都冇咁好搵啦，難怪已31歲嘅湯仔，暫時無意退居幕後。
不過無論如何，做得騎師梗想贏馬，面子悠關，湯仔一定力求開齋。今期佢嘅座騎中，最有睇頭係「多多心得」，話晒季內已熱身兩仗，今次跑番曾兩勝嘅谷草，威力比沙田大得多，加上輕磅及排內檔兩大優勢，真係唔好睇低湯仔呀！