蘇樺偉噚日喺仁川亞殘運嘅T36級200米決賽只得第6名，仲未攞到牌，但港隊呢日憑劍擊、輪椅舞蹈、乒乓球同草地滾球連擸5金，金牌數字已經有8面，超越上屆5金成績，仲創咗亞殘運歷史佳績。港隊噚日由輪椅劍擊嘅譚湜深首奪男子B級個人佩劍金牌，之後贏埋男佩劍團體金牌，阿深賽後話，同太太陳蕊莊一齊贏金牌真係奇妙旅程喎。另外港乒隊喺女子11級單打包辦決賽席位，最後黃家汶贏咗吳玟薈，而馬華強同何希雯就喺輪椅舞蹈拉丁舞奪金。
至於連輸100及200米嘅蘇樺偉，賽後仲講笑話因腰傷幾乎未練過嘅情況下，能夠跑出呢個成績已有所交待：「跑咗兩項目都冇話失唔失望，畢竟自己賽前冇練習，有呢個成績都唔錯。」「偉仔」今日出戰個人最後一項男子T36級400米，佢只話會盡力而為，同時感謝每位現場支持佢嘅朋友，令佢更有動力繼續跑落去。
識睇，一定係睇足英台【英波Live】：
http://soccer.appledaily.com
http://bit.ly/engballlive