「魔鏡魔鏡，世界上邊個最靚？」估唔到來的2014年，皇后仲要問一個咁老套嘅問題。不過，時代進步，依家塊魔鏡改左個好潮嘅名，叫Siri。冇錯，皇后貴為一國之君，佢寧願信Siri，都唔信真正嘅人。將Siri 呢種機器當心腹，呢類人我會統稱為「孤毒」，好「毒」咁「孤獨」一生。
「當然係白雪公主。I will now recap in English，Snow White for sure la！」Siri 冰冷的回覆，更刺激皇后嘅腎上腺素飆升。有睇過《白雪公主》嘅都知，皇后係唔容許有人靚過佢。
不過有冇人諗過，佢皇后嚟架，咁多0靚，點解要自己粉墨登場，扮巫婆去深山昆公主食毒果？好簡單，因為皇后衰極都知自己唔可以濫用皇權，俾人知自己唔抵得人地索過佢，就用公帑去揼公主，佢覺得對唔住自己個皇冠，過唔到自己嗰關。再者，就算係惡毒嘅巫婆，面皮都可好薄，佢真係唔想俾人知佢真心小氣囉。我重申，依家係2014年，所以皇后決定度新橋去害公主。
白雪公主一向都知皇后唔妥佢，早排識到嘅小矮人們勸佢走佬好耐。佢都諗過去對面海一個叫做「鳳梨酥」嘅小島，不過皇后一直都想夾硬認嗰邊個皇帝做仔，仲要屈人地係親生仔。
真係一日唔死都仲有新聞，呢個情況就好似隻老虎同隻兔仔講：「你係我個仔，仲要係親生嘅！」「但你之前明明想食咗我，虎毒不吃兒。」「廢話少講，我給你食糧，快來認親娘！」擺啲小三通、大三通、咩通物通，同時仲要箍住你條頸逼其他人種認你做阿媽，仲一定要笑住認，除左變態，我諗唔到更好嘅形容。但慘係，鳳梨酥皇帝似係想俾佢通一通！
咁就死啦，問你一個問題，有咩慘得過坐監？就係放監後，發現原來監門外係另一個監獄！所以去鳳梨酥非長遠之策。
「咁不如去花旗，聽講最近有得抽花旗卡，中左好過中六合彩！」其中一名小矮人興奮的說，其餘嘅熱烈地談論去花旗有咩好。「夠啦！你地係咪唔正常！點解我要離開自己屋企?」「公主，想離開係正常嘅，有得走，梗係走！」
此時，小矮人們收到whatsapp密報，「警告公主，盡早逃離皇宫，否則使用武力！」公主決定，從速撤離！
公主身驕肉貴，點止「十指不沾陽春水」，佢直頭係「半生不搭地下鐵」。不過危急關頭，小矮人提議同公主坐地鐵（066）去旺角先，因為皇后一定唔會去嗰度。「聽講地鐵日日都勁多強國人，又逼，仲要成日壞車，我驚驚呀。」
「公主，以前嘅港鐵就係咁，但依家出邊有班黃傘，搞亂呢個國度，所以依家交通情況反常！Red tunnel 唔塞車，地鐵唔壞車，仲要冇咩強國人！香港好反常！」
公主好唔明，點解唔壞車、唔塞車呢咁開心嘅事，小矮人反而覺得唔正常。難度佢覺得人生要浪費時間喺塞車、壞車度先有價值？不過算啦，都唔關佢事，話晒人一世，物一世，呢個moment，有件事一定要做：拎出電話，開Instagram，校好角度影selfie，加caption：「原來坐地鐵真係既方便又快捷，我愛自由 #freedom #hongkonggal #snowwhite #pretty #hongkong #sad」
續...
By千頌C@堆填區
http://fb.com/winbigwok