香港電台嘅社區參與廣播服務試驗計劃嚟到第6季，今季有個節目叫《我是非洲人》，係香港第一個非洲人自家製作嘅電台節目，主持人Sylva就係喺香港定居咗15年嘅非洲人。Sylva話，希望透過呢個節目，令香港更加認識真正嘅非洲，佢仲大讚香港，話初初嚟到香港嗰陣，仲會有人叫佢做「黑鬼」，𠵱家已經冇嘞，令佢覺得香港確係一個國際城市，和諧、開放，所以決定畀三個小朋友喺香港長大。
除咗《我是非洲人》，港台呢個社區參與廣播仲有唔少有趣節目，譬如講視障運動員、思覺失調康復者、腦退化症同埋香港口述歷史等。無眼睇大台爛劇嘅觀眾，不妨捧吓呢啲小本節目場。