睇見黑警濫權暴力毆打學生同示威者睇到眼火爆，激發去過佔領區撐學生嘅IT人阿強，同同事通頂三日整咗個全新android手機遊戲《Yellow Umbrella》。
設定學生只能防守
多個火紅人物，包括亂用胡椒噴霧同催淚彈嘅警察、去到全世界都要食榴槤嘅光頭阿叔、私煙BB同收工男，連炒蟹老闆、四點鐘許Sir都有登場，狼振英更係終極「大佬」，玩家只要集齊武器，就可以打低佢哋，用嚟洩忿都幾好，難怪推出唔夠一日已經有逾二萬人點擊睇過。
阿強同八方講，遊戲設定學生角色不能攻擊，只能防守，皆因學生就算受到好多衰人挑釁打壓，都一定要堅守和平非暴力。佢參考現實情況後，設計出克制唔同衰人嘅道具，玩家只要收集喺螢幕出現一定數量嘅黃絲帶，就可以「出招」。例如對付胡亂「出椒」警察同亂噴口水嘅許Sir，就要用黃遮；面對持生果刀嘅光頭阿叔，梗係要用榴槤；私煙BB則要用生日歌擊退；收工男同黑社會就可以五百蚊趕佢哋走。至於踩場嘅的士就貴啲，要用二千蚊㗎。
至於屬重量級防守工具的水馬，用嚟擋住防暴警，若然玩家儲夠三百條黃絲帶，更可以出「必殺技」，呼召關公幫拖，一次過清走為狼英服務嘅打手。關公雖勁，遊戲卻設定不能對付無神論者狼振英，要打敗呢個終極大佬，要用咗五千萬嘅金磚先可以，擺明寸爆狼英被揭私下收咗澳洲公司五千萬。
阿強話呀，希望透過呢個遊戲，令更多政治冷感嘅香港人關心現時學生嘅訴求，即使唔認同佔領做法，都唔好學班踩場衰人咁，抹黑同打壓呢班為咗香港民主，連日辛苦瞓街嘅後生仔。
李八方
mailto:[email protected]