滬港通萬事俱備，只欠東風，唔少中環人都認為東風遲遲未吹到，唔多唔少同雨傘運動有關係。一班搵錢至上嘅金融界人士可能想向阿爺表明愛國愛港嘅心迹，務求滬港通可以盡快開車，證券學會會長李細燕近日就發起業界，準備本周四一齊送生果籃去灣仔警察總部撐警。
宜送雪梨下火
近排好多支持示威者嘅朋友見秋風起，拎住一袋二袋生果去示威區撐學生，估唔到細燕姐都學呢招，不過佢就係送生果畀警察。佢早幾日開始號召九大金融業商會嘅老友，包括散戶實識嘅香港股票分析師協會會長鄧聲興，計劃本周四收市後一齊去灣仔警察總部，舉行一場「香港金融服務界支持警隊依法執法」活動。
華華唔係警察們心裏面嗰條蟲，唔知佢哋鍾意食乜嘢生果，但睇佢哋最近嘅狀態，對住示威者嘅時候咁躁，應該係心火盛，細燕姐可以考慮送多啲雪梨畀佢哋下火，滋潤一下。
要食生果當然唔少得要用生果刀喇，細燕姐不防考慮順手叫埋去到全世界都會帶把生果刀嘅「榴槤乜乜乜男」一齊去喇，咁樣會方便好多喎。
講開又講，早排立法會金融服務界議員張華峰同中資證券業協會會長閻峰出席金融界國慶晚宴嗰陣，雖然身上面釘住藍絲帶，但係佢兩位仁兄都打咗條黃色領呔，即刻俾人話佢哋係暗撐學生。今次呢個撐警活動，唔知細燕姐會唔會提出指定嘅服裝顏色呢?
李華華
mailto:[email protected]
【直播學聯政府對話】
時間: 周二下午6時
雨傘革命: http://umbrella.appledaily.com
YouTube: http://bit.ly/umbrellalive