4月尾主打中國光纖（3777），到咗8月15日，最高曾上到2.99元，幾乎翻咗半番。集團主打光纖瓣數，食住環球光纖推動政策，繼續肥仔，呢轉調整，幾乎去返起步位，又有得諗。
中國光纖主打光纖活動連接器同接配線產品。啱啱喺最新半年度，純利就增長咗23%，到1.6億元人仔。中國光纖食住祖國光纖入戶同農村寬頻國策，喺嚟嘅緊幾年，已經長搵長有。
受惠全球光纖好景
又環顧海外，澳洲同樣推動光纖入戶政策，成個製作，去到2019年先完成，所講嘅投資規模，去到2,900億元。至於金磚四國當中嘅巴西，亦都取消本土特惠政策，今年4月正式宣佈，將4G移動互聯網項目作全球招標。隨住巴西開放，亦畀包括中國光纖呢類周邊配套商，多咗條財路。
事實上，喺今年半年度，中國光纖嚟自澳洲嘅收入，就大幅增長咗1,022%，到3,170萬元人仔，澳洲寬頻網絡政策，係實實在在畀到中國光纖多一條財路。但家陣嘅澳洲業務，只係佔中國光纖總收入9.8億元人仔3%，基數仲係好細，地區業務高增長一旦全面反映，中國光纖會好爆炸。
唔好估多，中國光纖全年純利增長，只要係keep住23%，去到4.1億元人仔，就算連埋7月配股攤薄計，預測PE得6.7倍。家陣主打內地市場嘅台灣光纖股華星光，預測PE去到16倍，祖國烽火通信25倍，中國光纖平咗一大截。
買中國光纖，現價（2.15元）翻半番到3.2元計數，今年度PE先上到10倍，未有耐追到行家水位。又集團目標價比起上邊7月配股價2.42元，先升得三成，全球光纖好景，又要諗吓，投資者係咪只係貪呢個少少回報？
錢雋
細價股專家
本欄逢周二、三、五刊出