月初先慶祝完33歲生日嘅「神奇小子」蘇樺偉，噚日喺仁川亞殘運田徑T36級100米跑矚目登場。呢位「6朝元老」有晒經驗，但近排一直受腰傷困擾，最終只係跑出13秒67，排名第5，隊友袁家健同陳泳森就分別排第6同第8。不過大家唔使擔心，偉仔賽前講過，今日上演嘅200米先係佢嘅目標，有信心可以奪牌而回。偉仔雖然失牌，但佢嘅師妹黃思恩就喺同級嘅女子100米跑奪銅。
另外，世界冠軍組合劉慧茵、梁育榮同埋黃君恆，就喺硬地滾球BC 4雙人賽決賽，神勇擊敗泰國組合奪金，一班戰友亦都喺BC 3雙人同BC 1及2隊際賽添銅。至於衞冕嘅輪椅劍后余翠怡，喺女子個人重劍A級決賽，以1劍之差輸畀中國猛將榮靜，同B級嘅隊友陳蕊莊齊齊奪銀。港隊之後喺輪椅舞蹈同女子S14級100米蛙泳，再拎走兩面銅牌，去到第2日已經累積3金4銀11銅，認真威水。
識睇，一定係睇足英台【英波Live】：
http://soccer.appledaily.com
http://bit.ly/engballlive