眼見今日香港嘅景況，經常會對未來有唔同嘅幻想。而家郁啲就話係外國勢力入侵，咁香港下一代小朋友，會唔會唔畀接觸日本卡通片、玩外國玩具？到時電視播係《喜羊羊》、中核幅射嘅米老鼠？真係諗起都覺得殘忍！
卡通片同玩具角色都係唔少人好朋友，Barbie同Hello Kitty呢兩個auntie更加唔使講，前者今年55歲，後者今年啱啱40，但到今時今日都仲有唔少小朋友攬住佢地瞓。不過，查實呢兩位阿太都陷入中年危機，急求對策搵出路。
兩者對比，Barbie更大鑊！生產商Mattel第三季淨收入按年跌22%至3.32億美元，當中Barbie更大跌21%！而家好多小朋友，寧願玩iPad，都唔玩Barbie。Mattel唔係冇試過救Barbie，今年賦予Barbie新職業—行政人員！手執tablet、手袋仔、一身OL打扮，咁咪失敗囉。資訊咁發達，仲設計咁寫實嘅造形，完全冇幻想空間，冇銷量好正常，咁亦解釋咗點解造型邪惡嘅Monster High咁賣得。
相反Hello Kitty就聰明得多，夾啱今年40周年，之前突然話自己唔係貓，而係倫敦少女，粉碎所有人固有認知，從新製造想像空間，配合生日宣傳攻勢，令人氣反彈。其實兩個auntie命運咁唔同，差別唔係樣，而係有冇請一個好公關。
Fifi
http://www.facebook.com/lovefrystock
本欄逢周二、四刊出