61歲嘅老牌練馬師Gary吳定強，堪稱跛馬救星，過去好多有嚴重腳患，其他練馬師放棄唔要，瀕臨退役嘅馬，轉去吳廐一試，結果都畀Gary救得番，好似「喜逸」就係好例子，冠軍練馬師方嘉柏都搞唔掂贏唔到，但上季喺Gary手上，健康回復正常外，仲先後取得兩場頭馬，本身應有實力得以重見天日。
將會喺今期夜賽上陣嘅「但求勝」，極可能成為另一匹「喜逸」，呢匹七歲馬在港未贏過，但質素一啲都唔差，當年一出就喺三班入Q，累積喺三班上名五次之多，而且全部係谷草賽事，場地性能極佳。可惜佢有嚴重腳患，前季跑得兩次，之後轉去吳廐，足足缺陣約19個月，到上季五月先復出，不過上季尾喺吳廐復出後，已經可以勤跑係好現象，有一場谷草更跑得第四，反映已逐漸回復戰鬥力。
踏入今季「但求勝」健康進一步轉穩，最近積極備戰，本月10號試谷草大閘，更有前有後跑第二，狀態起得相當好，今次初跑五班明顯有班利，用到猛將巫斯義，唔似只求熱身。睇嚟Gary呢位跛馬救星，又有機會贏得掌聲咯！