亞洲鼓王Donald Ashley（唐龍）前日因肺癌撒手人寰，終年58歲，其妻知道老公患癌，大受打擊後中風，於上月2日更不幸離世。Donald生前曾跟許冠傑、徐小鳳、林子祥、張學友、陳奕迅等巨星合作，約個多月前，陳奕迅、露雲娜夫婦、徒弟樂隊Mr.鼓手Tom曾到醫院探望，可惜現已天人永隔！
Tom：佢做人好有目標
Tom曾跟Donald學打鼓4年，昨他接受電話訪問說：「佢教識我對打鼓嘅堅持，好多人覺佢火爆，但其實好nice，對學生無條件付出，佢好堅強同病搏鬥，每日爭取最新鮮空氣打仗，臨走前入咗隔離病房，見佢咁辛苦，唔知有乜幫到佢，相信𠵱家最舒服。」問師傅是否想跟師母離去？他嘆說：「佢冇直接提過，但佢做人好有目標，講過太太唔喺度，唔知可以做乜！」
Donald生前曾跟單立文、蘇德華等合組樂隊Chyna，單立文在電話說：「噚日打畀佢囝囝想話去探佢，佢囝囝話前日醫生講冇乜事，點知收線隔一、兩小時就走咗，講真都預咗，聽囝囝講佢好硬頸，成日唔肯睇醫生，到腫瘤逼住食唔到嘢，谷住要入醫院用儀器撐開食道，佢唔肯做化療，只係靠中藥針灸。」單立文透露Donald臨終前錄了兩首歌留紀念，可以說了心願離去。
港台前高層吳錫輝則說：「當年Donald玩Ramband開騷，自己同葛劍青做司儀，最後一次見佢係兩、三年前，當時Ramband喺樓上bar開迷你演唱會，大家傾好耐偈，本來Donald住聖保祿醫院，後來老婆有事住QE，佢轉埋QE陪老婆。」
黃貫中：你是真正的鼓王
Donald的離世震驚樂壇，曾跟他合作的關淑怡在微博悼念：「他是一位我非常尊重的音樂人，我的第一次紅館95也是由他擔任鼓手。」黃貫中寫道：「兩星期前和你的那個擁抱，我已怕可能會是最後的一次，謝謝你喜歡我送你的那幅畫，我也會永遠記得你最後和我說的居然是『fxxk it！』，在我心中，你永遠是真正的鼓王。」鍾鎮濤、葉世榮、杜德偉等亦留言致哀。
採訪：皓騫、魯吉
人物誌：無師自通桃李滿門
Donald Ashley中文名叫唐龍，父親是美國人，母親馬來西亞人，在香港出生的他從小以中國人自居，5歲時收到康加鼓作為生日禮物，自此對敲擊產生興趣，靠努力和天分無師自通成為亞洲鼓王，才華橫溢的他更是作曲、填詞、監製的全能音樂人。
Donald於70年代加入樂隊Ramband成為鼓手，其後與單立文、蘇德華和黃良昇組成Chyna，歌曲《Within You'll Remain》大受歡迎，85年Chyna成為第一隊到內地舉行演唱會的香港樂隊，身為亞洲鼓王的他，徒弟包括樂隊Mr.鼓手Tom、LMF成員Kevin、女子樂隊Choco等。
【三個粉絲去首爾】
追星實錄，即上韓劇讀: http://hk.apple.appledaily.com/kstar