成日老作抹黑民主派嘅「民主真兄弟」，又再發功抹黑佔中搞手！佢哋喺facebook專頁話聲稱收到網民爆料，指「香港中文大學美國中心」向16名佔中核心成員包括學民黃之鋒，每人送一部iPhone 6，仲指定要用iPhone 6聯絡同發送資訊，專頁仲貼咗學聯成員岑敖暉同周永康攞住iPhone嘅相，言之鑿鑿話：「這幾天我專門通過獲得手機的人員了解內情，發現確有其事」。
中招被屈收愛瘋嘅之鋒喺fb留言斥揑造，「好明顯係假㗎啦，至少我到𠵱家都收唔到」，仲反問：「唔通真係一部iPhone 6就收買到我，儍的嗎？」查實之鋒同陳健民都用緊「三叔」（Samsung），根本唔係「果粉」。