呢個禮拜六就會成為陳太嘅黃伊汶（Emme），噚日同周慧敏（Vivian）、馬國明緋聞女友徐佳琦，喺尖沙嘴出席護膚品活動。仲有幾日就同陳國坤喺峇里島舉行婚禮嘅Emme，心情靚靚晒幸福，不過佢個前度男友余文樂似乎唔多幸福，傳話樂仔仲係放唔低，用盡方法想翻撻，起先Emme好大體咁話：「都過咗咁耐，各人有各自生活方式，我會祝福佢，佢梗係有祝福我，我哋好好朋友太多年，我身邊嘅邊一個都會祝福我。」
「玩嘢咩」
當問到Emme有冇請好朋友樂仔飲時，就即刻有反應：「玩嘢咩？唔會，佢咁忙。」係咪覺得樂仔未定性，Emme話唔再講樂仔，不過佢話婚後會繼續工作，暫時冇生仔計劃。
同場嘅徐佳琦自爆馬國明有因為緋聞打電話畀佢道歉，佢話大家只係朋友，之前兩次見面都係大班朋友聚會，其實唔熟。唔知馬明係咪佢杯茶呢？佳琦表態話：「做朋友都幾好。」另外，Vivian話嚟緊要閉關籌備年底出嘅福音碟，自己監製兼作曲，又搵咗王菀之合作。
撰文：馮仁昭
