27年前嘅今日，香港正停市四日中。到今日，孫柏文同大家又活在大時代。上周我講過話已清倉，今周冇變。上周亦講過點解，原因係相信數周內美股會出現大調整甚至股災。結論係得聯儲局重啟量化寬鬆再印先可阻止。我篇文出街後美股真係開始大跌。可能係咁，聯儲局分行經理就上周出口術話「我哋可以年尾加印」，一講美股彈。同一條友喺10月6日先話會比市場預期快收緊，一周後就轉軚。黐線。最弊亦同時好彩係呢條友冇投票權，所以如果到10月尾聯儲局會議時，佢哋完全當呢條友透明，美股凶多吉少。
新聞封鎖禍及股民
今日想提吓一國兩制夢之香港改變大陸。當大家以為香港對大陸改革開放再冇貢獻時，我哋現已做好解放木馬。係乜？就係滬港通。點work？資金要有效分配，資訊自由流通極緊要，如果唔係就唔會狂打內幕交易。大陸係冇新聞或資訊自由，微博連「雨傘」一詞都block。假設滬港通開波，大陸股民湧港，點知雨傘運動旺角場有乜差池，港股暴跌，大陸股民連輸錢點解輸都俾國家block咗，仲唔喺浦東暴動？香港仲唔成為改革嘅外來勢力，慫恿啲大陸人上街造反？到時一係收返滬港通，一係開放大陸資訊流通。估唔到，一日嘅大跌市對「喚醒大陸人」嘅效果大過梁國雄議員及所有左膠一世嘅做show。
最後想講雨傘運動。香港法治係我哋張皇牌，李嘉誠先生都驚冇咗呢樣嘢，所以我見警察行私刑時極沮喪，不過同時我亦反對行政機關同霸街人士傾特赦，因為呢個同私刑有異曲同工之效。差人應該拉人，之後落charge，令我哋香港人可以講出最文明的一句：「法庭見，等官判！」
施永青話要人大常委收返報告就要推翻中央政權，我只可以話don't give us silly ideas，因香港某啲人嘅知識加啲乜獨人士條難命時，要驚就唔係驚旺角亂，而係大陸啲機場、口岸、煉油廠。唔使外國勢力介入，大陸都會一發不可收拾。
孫柏文
獨立股評人
http://facebook.com/shuen
本欄逢周二刊出