呢場遍地開花嘅佔領運動，港人唔單止向全世界呈現咗和平示威嘅素質，唔少人例如黃之鋒等仲揚威外國，登上《時代雜誌》封面。但原來除咗港人同之鋒，有個地方亦已世界著名。
事關繼「公民廣場」代替咗政府總部東翼前地、「旺角關帝廟」落戶後，全世界人都用到嘅Google Map又有新地標：「光明磊落的暗角」。大家以後只需輸入「光明磊落的暗角」，地圖就會顯示位置，即係中環龍和道發電機房外；呢個地點，咪就係公民黨成員曾健超被7名警察包圍毆打之處囉！雖然呢個地標只係市民自行標示而非Google Map制訂，但都足以喺世界揚名咯。