土炮重建中環　消失的碼頭立現

提起模型玩具，香港市面買到嘅、玩到嘅，我諗九成都係嚟自日本或者外國。難得見到本地出品，仲要係極具特色嘅香港碼頭，實在令人「滾動」。本土創意品牌「香港仔852」將於11月推出全新立體拼圖，重建mini版卜公碼頭、皇后碼頭同天星碼頭。呢啲中環地標其實早已成為集體回憶，從中可睇到香港嘅歷史同核心價值！

記者：朱崇德

攝影：楊錦文

近看碼頭石級，還有人釣泥鯭，大家嘗試過chok泥鯭煲粥嗎？

卜公碼頭加上一艘古式帆船，老香港老情懷。

對唔少人嚟講，香港仔852係個陌生名字。不過如果你有行開Page One，或大型嘅連鎖玩具店，可能經已見過佢哋嘅荔園系列。大門口嘅夢幻堡壘、會噴坑渠水嘅大象天奴、必玩嘅掟階磚贏香口膠、史上最細嘅摩天輪，以及回憶中永遠帶有尿臭嘅鬼屋（神秘寶洞），呢啲早就變成歷史嘅舊物，統統變成立體拼圖，重現大家眼前。

轉用實淨YUKO紙

新的3D碼頭系列，同樣不脫紙紮模型本色，不會見到像日本模型般的精細分色拆件，甚至僅僅是最raw的凹凸入榫設計。不過砌模型時，完全不用看說明書，因為實物早已深印腦海，自自然然逐件嵌上，十餘分鐘就能完成作品。新作當中，最吸引眼球的，相信會是卜公碼頭。香港仔852 director歐陽永權（Andrew）都話：「對香港人嚟講，卜公碼頭嘅回憶特別深刻，或者係多任港督都喺嗰度上岸啩！加上呢個碼頭唔似其餘嗰兩個咁變成歷史上嘅微塵，因為喺九十年代，香港人嘅本土意識開始抬頭，香港政府又喺保育意識同其他因素驅使下，拆除之後，喺赤柱美利樓附近重新興建。」
如果砌過荔園系列，你會發現新作有很大改進。紙料由以前的厚身卡紙改為更薄、更有彈性的YUKO紙，完全解決以往入榫時紙料會散開及變軟的問題；凹凸位感覺扣得更實淨，如果手工夠好，可以不用白膠漿，減低受潮的機會。

歐陽永權Andrew　

香港仔852 director、低俗頻道創辦人

獨愛第三代天星碼頭

位處中環的天星碼頭，其實已歷幾代變革。「第一、二代都係起喺雪廠街，而我整嘅立體拼圖係參考第三代。因為我細個嗰陣未有地鐵，如果要由港島過九龍，好多時都要喺天星碼頭搭船過尖沙嘴，所以佢畀我嘅感覺非常強烈。喺嗰度你會見到好多外國人，有啲係西裝筆挺嘅銀行大班，又有打工仔、擦鞋仔、人力車車夫，回憶非常深刻，所以我想透過呢個模型，懷念以前嘅日子。」Andrew如是說。
為何不選最古舊或最現代的設計，反而敲定以第三代碼頭作藍本？「第三代天星碼頭嘅設計非常簡樸，好多地方都只係求其遮着個頂就算，唔似第二代或者𠵱家嘅天星碼頭（仿照第二代興建）咁優雅。但我喺嗰度長大，睇住種種嘅人和事，對佢嘅感情亦由此而嚟，亦係我特別鍾意第三代嘅原因。」
說到最具歷史性的，必是皇后碼頭。Andrew說：「我之所以要做皇后碼頭，係想話畀後生嗰輩知，好多年前有個碼頭，係特登做畀英女皇嘅。記憶之中，1975年英女皇訪港嗰陣用過。」籌建碼頭時，遮打爵士更連繫了當時的大商家，為英女皇及皇室成員建造銅像，從而令香港商家及英國皇室建立關係。「成件事畀人嘅感覺十分優雅，而且仲為香港帶嚟一個地標景點，令香港人喺生活、文化同文藝上都得以提升。我覺得以前嘅人喺呢方面嘅表達，係嚟得含蓄同聰明一啲。現在嘅人一味赤裸裸、向錢看，簡直是兩回事。」

天星碼頭

第三代天星碼頭與膠鴨應該從未處於同一時空，但在藝術世界，它們相遇了。

幾艘天星小輪，做得維肖維妙。

碼頭上落船位有點受潮變形，大家保存時要小心一點。

不忍抹去歷史痕迹

Andrew續說：「我覺得好老土囉！𠵱家香港政府好像要將所有有殖民地色彩嘅嘢拆晒，感覺似俾大陸政府洗腦咁，有如一種屈辱同恥辱。如果可以認真咁睇，你會發現呢啲係香港歷史嘅一部份，絕對冇必要將一個地方嘅歷史同過去抹走，就算抹走咗亦唔代表呢啲事唔存在。例如我們失去咗皇后碼頭、邊界石俾人偷咗又唔知、我哋嘅郵筒無端端變咗綠色。又例如𠵱家嘅警察制服設計到好似公安咁樣，彷彿要跟中國同步；以前嘅警察制服係要度身訂做，當年喺北角有一間裁縫店，會為每位警察度頸圍、腰圍，特意為佢哋鏠製警服，所以着上身之後，睇起嚟會份外醒神。英國佬時代，警察係維持法治嘅象徵，所以你嘅表現唔可以含糊不清，我覺得香港政府將呢啲事變得越來越中國化。」