股壇長毛David Webb呢排少講股票，反而十分關心雨傘運動，唔止一次落去示威區，兼且緊盯狼英。佢前晚睇完亞視國際台主持人褚簡寧訪問狼英，見狼英係咁否認曾經講過打算2017年參選特首，噚日即刻喺自己網頁上載一條合成片，前段係狼英前晚否認嘅片段，後段就係狼英舊年1月同樣接受褚簡寧訪問時，信心十足咁話自己以參選2017年特首為目標，因好多挑戰同問題並非5年可以解決云云。
其實喺𠵱家呢個「有圖有片有真相」嘅年代，大家說話真係要諗清楚，以前冇拍片，政客或上市公司管理層就話可以賴傳媒聽錯、寫錯啫，𠵱家大家睇片就一清二楚，可唔可以唔好再成日講咗唔算數呢？Webb就估計，狼英呢次反口，會唔會係中央已經叫咗佢唔好參選2017年特首呢？既然中央落咗柯打，佢咪唯有否認囉。
【直播學聯政府對話】
時間: 周二下午6時
雨傘革命: http://umbrella.appledaily.com
YouTube: http://bit.ly/umbrellalive