佔中／佔領運動期間，因港島東西交通橫腰截斷（十月十四日重開金鐘道之前），交通極為擠塞，住在半山區嘅老友，放工返屋企認真頭痛，例如地產L住在花園道，在旺角返工，早上晨早出門還可以由花園道轉往皇后大道中去西隧過海返旺角，唔算塞車，但晚上從西隧出嚟，就要西行去半山轉入般含道塞車返花園道，淨係由出西隧開始計，返屋企要一小時，好彩佢有司機，自己坐在後面可以睇文件當辦公啫。
船務C另有發現，佢話幾十條巴士線被逼取消後，軒尼詩道交通暢順得多，平時咁塞車原來係因為有太多缺乏乘客嘅巴士，經過呢次無意嘅「控制實驗」，巴士路線可以大幅度重組，消除無謂路線啦。左丁山對佢講，政府一定唔敢，區議會一定誓死阻止，軒尼詩道註定係黃昏時間巴士停車場。
交通亂籠情況之下，最好就係坐地鐵，但行動不便者就要認真小心咯。Sweet Boutique嘅甜品大師黃耀文（Tony Wong）於十月十三日在皇朝會請吃晚飯，左丁山特登行去上環站坐地鐵，果然有位坐，到咗中環，望吓湧入嚟嘅乘客，已經怕怕，到咗金鐘，更大吃一驚，到灣仔嘞，逼番出去，從會展散場嘅人士如潮水湧至，左丁山在行人天橋向會展方向行，幾乎俾啲人潮推返轉頭。行得辛苦咯，到咗皇朝會大堂，要企定定唞氣兩分鐘，上到去，老友伍成邦（Simon）介紹識Tony，佢問「我地啲蛋糕食過未？」左丁山笑曰：「食過，夠晒貴，仲貴過Cova蛋糕，算係藝高人膽大。」Tony話：「我在帝苑酒店出身，負責研製甜品，唔識用廉價食材嘅，所以產品價錢係貴啲，最緊要啱你口味！」帝苑酒店係新鴻基旗下，有一特別之處，呢間酒店係劃歸大哥郭炳湘監督嘅，以前聽過郭炳湘對食物情有獨鍾，不時親自去帝苑巡視，於是趁機問Tony係唔係？Tony話：「係㗎，郭先生周圍去旅行，返嚟就有好多外國著名食肆嘅招牌產品照片，交俾我地研究、試做，佢親自試食，色香味都要似足，依家帝苑酒店嘅餅店係好靚㗎！」Tony有此訓練，自己創業自立門戶之後，坐鎮九龍城侯王道間餅店賣蛋糕，雖然貴價，但生意好到不得了。近月佢與伍成邦合作開辦「甜藝家」Sweet Boutique，推出金菠蘿酥，各式蛋卷，七種味道，各式甜點，以低糖及健康食材炮製，一出就大受歡迎，Tony不愧係甜品狀元也。