谷草跑番馬，連帶好多騎師都鹹魚翻生，黑仔王李富正係最佳例子。開季以來未入過凱旋門嘅佢終於破悶局，第三場四班1800米接手「龍騰虎震」後上一攻而破，取得個人今季第一W。無巧不成話，上季佢唯一頭馬兼開齋馬「精精彩彩」亦係來自賢廐同埋跑谷草千八。呢場整定李富有運行，「龍騰虎震」連輸兩場之後柏寶唔騎，落入佢手中，連落飛黨都睇穿呢個契機，臨尾大注打到此駒WP齊着綠燈，結果飛到馬到，輕勝兩個半馬位，造就李富開齋。落飛黨雖然扑中「龍騰虎震」十倍W，但係搭「大將軍」呢條啡燈Q就畀「幸運新寶」破壞咗，事關「大將軍」拉士一步頂唔住只得第三，畀「幸運新寶」搶到呢席Q腳。
「龍騰虎震」練馬師蘇偉賢表示，一定要感謝馬主洪定騰的耐性和支持，此馬上仗由柏寶策騎後，柏寶覺得馬兒麻麻，所以唔騎益了李富，真是走寶了。蘇偉賢並指該駒在沙田好失望，因此回師快活谷，希望有突破，他又認為李富其實唔曳，只是香港騎師競爭好大，他又慨嘆綀馬師競爭亦都大，要贏馬好難，所以十分渴望赢馬後接受傳媒採訪呢！