先前提過，過去一個月的下跌，唔止係受到佔中影響，當中最少有三個因素。不過，其實在過去一個星期，港股在交易時間表現並唔算太差，下跌通常都係隔晚嘅事，咁即係話，三個因素入面，佔領運動同埋滬港通呢兩個本地因素，影響力已經減退。
佔中與滬港通影響減
事實上，雖然佔領運動係持續，佔中反佔中有兩極化嘅走向，社會撕裂係事實；不過，大家睇到發生大規模流血事件的機會甚微，而近日零售股公佈的黃金周銷售數據唔算太差，再加上部份原先被佔領的部份道路通車，可以話，佔領運動對股市嘅影響已經唔大。至於滬港通方面，雖然李小加上星期五表示未有開通時間表，似乎係有機會延遲，不過，港交所近日發佈了很多有關滬港通的細節文件，顯示滬港通正籌備得如火如荼，就算遲，其實都只係技術問顯而唔係原則問題，冇乜好擔心。
倒是美股這個因素，唔容易睇。環球主要股市的指數，近兩個月的跌勢十分明顯，其中美股標普500指數跌穿近兩年來的穩定升軌，而英國富時100指數、德國DAX指數以及法國的CAC指數，則紛紛跌穿近三年的升軌，過去幾年的龍頭──美股亦因而走弱，難免令人憂慮。
另一邊廂，過去一個月，美國中期和長期國債孳息率加速下跌（短期國債孳息早處於極低水平），10年期和30年期債息均處於逾一年的低位，市場對美債需求強勁，恰恰與退市的方向相反。綜合兩邊來看，股跌債升，其實是典型的對經濟前景不信任的現象。美國經濟正正係乍暖還寒，似乎睇好睇淡都有市場，而我相信經歷大升大跌之後，應來個大單邊。所以，美股經歷上周五大升之後，造出的第一支陰燭，要特別小心處理，因為這經常是投資者對後市的表態，如陰燭之後就一蹶不振，則淡友仍會主持大局一段時間；相反，若指數能再成功超越近幾日高位，我相信後市會再展升浪。
影響港股的三個因素，頭兩個無甚驚喜或驚嚇，只有美股充滿懸念，不過美股與港股相關性正逐步減弱，美股升，未必會為港股帶來超大升幅，近日美股跌，亦只是拖着港股後腳，未至技術性擊倒。綜觀三個因素，我覺得只要期指突破23527，可以擺脫美股拖後腳的顧慮，而手上的好倉，由於未見真正盤中跌穿止蝕位，仍然持有。
正如上周在電台所講，現在止蝕位因裂口下跌導致下移到22785，而在收高於23405之前，每一個突然急升，23100至23300之間都可以sell call來對沖，回落至低位就獲利，不停將持貨成本減低，簡單點講，期指收穿23405之前，高沽低唔加，收穿23405之上，便不作對沖，若盤中升穿23527，更可判定港股柳暗卻花明呢！
張士佳