中環大業主置地一年一度舉辦嘅慈善活動「鼠戰中環」，今年撞正佔中，因活動賽道同佔中範圍冇重叠，噚日得以順利舉行，所有參賽者都冇甩底。置地行政總裁彭耀佳承認，曾擔心活動受影響，最壞打算係取消活動。
講到佔中，彭耀佳話，置地旗下商場嘅商戶呻辛苦，佢希望社會各界盡快達成共識，「政治嘅嘢就喺番議會入面解決喇」。雖然話噚日活動唔使取消，但係大會為安全計，確係請多咗保安人員，現場見到保安人員不時四處張望，好高警覺性。
話明鼠戰中環，港交所（388）作為中環地膽之一，交易大堂同寫字樓都喺中環，今年繼續有派代表參賽，喺團體接力賽仲贏到季軍；冠亞軍分別係必勝客同埋美心。
港交所今年嘅參賽主題係西部牛仔，呢個主題係其中一名MT（管理培訓生）諗嘅，佢哋仲專登向大會申請用港交所上市編號388作為參賽號碼。除咗接力賽，港交所市場營運分科阿頭李國強都有落場參加個人賽，可惜冇拎到獎，不過大家都係志在參與啫。
【鼠戰我至靚】
每年「鼠戰中環」舉行，大家最留意各人服裝同扮相，事關參賽者與啦啦隊都會悉心打扮，襯埋一樣嘅主題，增添歡樂氣氛，靚女當然最吸睛。
