雖然新聞統籌專員（IC）馮煒光上任以嚟𤓓事盡出，包括三個字「不予置評」事件、攬艷女照片瘋傳、畀田少篤爆用金鐘仁筆名向非梁營開拖，最新仲將劇照當真相抹黑和平示威者，但似乎佢自覺表現超凡，好有博紮上進心，日前去書店打書釘時，就喺一本職場作戰書《升官加薪教科書》前駐足流連，莫非有一番鴻圖大計？
學「下屬功勞是上司的」
八方有朋友喺啱啱過咗嘅星期六，喺尖沙嘴一間書店見到IC打書釘，佢行行吓喺其中一個書架前望咗兩眼，駐足一陣先至繼續逛。呢位厚多士好奇咩書吸引到IC留步？行埋去睇就發現，嗰個書架最當眼處放咗本《升官加薪教科書》，呢本書係日本職場觀察家千田琢哉嘅作品，剖析職場勝利術，包括「下屬的功勞是上司的，上司的失敗卻要下屬扛？遇到這種情形，你該怎麼辦？」
伴狼如伴虎，尤其隻狼愛卸責，八方都明白，點解IC想學番一招半式保住飯碗，但觀乎佢辳事盡出仍然獲狼重用，相信佢唔使擔心冇機會升官發財吖！
當日dry到爆嘅IC，一支公行完書店再轉戰戲院睇《失蹤罪》（Gone Girl）。呢套戲其實係講述婚姻同愛情，又愛又恨嘅控制關係。曾經笑騎騎攬艷女嘅IC，唔知孤伶伶去睇呢套戲，係慶幸至今仲係孤家寡人，抑或羨慕戲中人至少有個伴羨煞旁人？
李八方
mailto:[email protected]
