黎諾懿年底同5億未婚妻李潔瑩拉埋天窗，一路都唔肯公佈婚期同擺酒地點嘅佢，噚日放咗張過大禮嘅相上微博，婚期越嚟越近啦！
驚受封路影響
黎諾懿接受電話訪問話：「其實有啲趕，噚日（前日）有event做，之後又要開工，好彩有女友幫忙，佢幫咗好多手，一切順利。」雖然就快做老襯，不過佢話心情都冇乜特別，因為同未婚妻早已經住埋一齊，兩個人相處咗好一段日子，所以分別唔太大。
之前外傳結婚日期係下個月8號，黎諾懿澄清話：「唔係，其實仲有啲嘢未搞掂，因為仲諗緊搞一日定兩日，呢樣仲傾緊，所以都未肯定到，等到一切落實，我會同一時間公佈日期同地點，跟住就會派帖。」問到擺酒地方有冇受示威封路影響？佢話：「都唔驚得咁多，希望快啲平息，可以舒服啲，好多酒店都喺港島區兼近封路嗰邊，會展已經去唔到，我已經揀閒日擺，但嗰段係放工時間，要再研究睇吓點處理先。」
撰文：馮仁昭
