「佔領運動」搞到政府高層、警察、大學生各方面人仰馬翻，好多意料所不及嘅事情層出不窮，一個大笑話就係有愛國報紙大篇幅講佔領運動嘅劇本在美國寫好，編劇家係美國政府或有關人士，策劃人係陳方安生、李柱銘與黎智英。佔中就是雨傘革命，演變成顏色革命，導致有神秘狙擊手向警察或示威人群開槍，製造大恐慌，總之香港有乜衰嘢，都係美國人搞出嚟嘅，美國錢、美國影響力、美國間諜皆滿佈香江，無處不在。既然係咁，解鈴還須繫鈴人，於是前個禮拜大律師公會批評學聯不可玩弄法治，陳日君懇請羣眾（不盡是大學生）退場，就係由美國背後指使嘅。前星期，啲反佔中老友透過WhatsApp，送來一篇不知出自何人手筆嘅說明文，指佔中/佔領運動即將結束，因為美國政府已經表咗態，奧巴馬要到北京出席APEC會議，與習近平商討中美雙方利益問題，唔想香港佔中一事成為中美障礙。美國表態之後，反共團體大律師公會與陳日君立刻出聲咯喎！
記者不妨訪問大律師公會主席石永泰，問佢有冇收過美國國務院嘅指示或命令，同樣可以問吓陳日君。左派人士之中，不乏讀書人，但唔知點解，讀書人一旦歸順左邊，就懶於思考，作文只會秉承上頭政治要求，搬字過紙，不敢理會內容是否合理，合乎邏輯或者犯眾憎。如果美國人在背後遙控劇本嘅話，整個運動就會有一個領導人（如黨委書記）在明在暗咁指揮行動啦，邊會好似依家咁，學聯去到旺角會俾羣眾鬧，突然間又走出一啲地盤技工嚟，在馬路搭棚建路障呀？大學生識鬼搭棚咩，呢次運動中，佔中三子早已靠邊站，泛民政黨已邊緣化，純學生不知可以捱到幾時，亦不知如何收場，假使有美國人在後編劇，點會咁荒腔走板呀！話建制派人士一埋堆就逐漸失去思辯力，有一個好例子，俊和發展集團係白手興家嘅公司，上一代從無到有係一個獅子山下故事，但第二代接管後，組織有變，建築行內人知道俊和已有相當股權賣咗俾中資企業，今次彭公子走出嚟話收回向港大科大嘅獎學金捐款，笑大人個口，一來銀碼太細，三四萬銀係乜錢呀，駛唔駛咁高調收回？而且中大冇收過俊和捐款，一樣收到同類通知信，簡直莫名其妙，中大都冇土木工程、結構工程呢啲學系嘅嘛！搞建築，要靠工程師人才，以後港大、科大、理大啲土木、結構、建築工程畢業生，識得避開邊間公司唔去應徵啦！