韋達呢排喺沙田捱打，對上兩個賽日都食白果，卒之呢日佢喺谷草贏番馬，第二場四班1200米，勝出大熱門上季最貴拍賣馬750萬的「金珀龍華」，幫自己同練馬師吳定強及馬主謝國輝，一齊打響今季谷中頭炮。此駒上季由韋達贏同程谷草1200米開齋，之後一直未能再捷，包括上仗喺田草影相輸畀「由心出發」屈居亞軍。今場渡江抽到內檔，韋達馬上吐氣揚眉，替「金珀龍華」以輕鬆姿態大熱取勝，跑第二係大冷門「欖球大使」，第三則係灰馬「銀飛龍」，同場三匹落飛馬「勁優秀」、「善喜」同「大勇士」全部冇影，落飛黨輸到嗌救命都似！
今場除了謝國輝拉頭馬外，他的兒子「龍華太旨」馬主大隻仔謝劍汶換了個新髮型，一身韓星金秀賢西裝look到場，與懷孕一段時間的台灣籍靚靚太太一齊亮相，搶晒鏡頭。至於謝國輝則說：「『金珀龍華』上仗原本應該赢馬，可惜甩蹄鐵及輕微擦傷，敗難作準，很開心馬兒今仗可以補中。此馬上季多次放頭跑，根本不合發揮，留前鬥後才是威力最強的跑法，今仗足以證明這一點。」