啱啱個禮拜六，真係睇到我求大俠呆晒，唔係話踢完國際賽後，又適逢歐聯前夕，啲歐洲列強例牌失分㗎咩？點知由9點半場拜仁慕尼黑開始，加埋之後嘅皇家馬德里，都係咁派蛋，買咗大波膽嘅朋友，肯定贏到笑。
拜仁皇馬共派11蛋
先講拜仁喇，其實佢哋近幾次撞正雲達不來梅，都例牌大數對手，好似上季聯賽作客，就派夠7隻光蛋，今次仲要撞正對手賽前跌落榜尾頹爆，點會執輸，開賽廿分鐘就由隊長拿姆先入波，展開呢場殺戮。之後沙比阿朗素亦入一腳靚罰球，射入加盟後嘅首個入波，加上梅拿及後再入12碼，而後尾亦有份入波嘅馬里奧葛斯，就同拿姆齊齊梅開二度，最終就以6:0大勝，睇過個「主其他」波膽熱到4.7倍，但如果有買，都算唔錯啦！
修頓淨勝8球最離譜
睇德甲睇到一半，10點場西甲波又開，皇家馬德里作客利雲特，開賽後冇耐，就由C朗射入12碼，雖然半場前只靠「小豆」入到2:0，但換邊後再嚟料，C朗61分鐘梅開二度後，占士洛迪古斯同艾斯高亦各入一球，結果湊夠5隻光蛋送畀對方，而呢個5:0波膽有14倍，似乎仲抵買。C朗亦成為西甲史上，首個喺頭8場聯賽入15球嘅球員。
上述列強點威都好，都唔夠英超嘅修咸頓，8:0狂炒新特蘭，邊個話攞完英超每月最佳領隊同球員都唔掂㗎？9月最佳嘅加斯安奴柏利咪一樣入兩粒，但最威都係杜辛泰迪治，入1球兼4個助攻，如果有玩「范特西」嘅朋友，就知佢爆分嘞。
識睇，一定係睇足英台【英波Live】：
http://soccer.appledaily.com
http://bit.ly/engballlive