金利豐（1031）老闆娘朱李月華喺鴨脷洲長大，每年都會返去搞場盆菜宴，兼邀請多位甘草藝人表演，以招待區內一班長者，今年竟然有一位特別嘉賓，就係賭王四太梁安琪，佢唔止人到，仲上台唱咗首《帝女花之香夭》，𠱁到台下嘅公公婆婆拍晒手。
朱太呢餐盆菜宴今年已經係第12屆，前晚筵開200幾席，認真大陣仗。雖然話搞咗咁多年，但係佢位手帕交四太就係第一次捧場。
四太前晚喺開席後一個鐘，大約7點先至拖住細女何超欣匆匆趕到，佢話因為啱啱喺澳門參加完全民運動會，仲落咗場跑「嘉賓友誼接力賽」，搞到遲咗返到香港。佢一到場，凳都未坐暖，就拍住藝人魯振順上台合唱一首《帝女花之香夭》。
唱平喉兼有做手
老老實實，四太平時說話都鵝公喉咁聲，好難想像佢大開嗓門學白雪仙唱「落花滿天蔽月光」啫，好在佢都知道有些少難度，於是選擇唱任劍輝嘅平喉部份。唱得興起，佢仲做埋做手，聽落望落都似模似樣。
美中不足，係佢記唔到歌詞，上台之前，特別要求工作人員搬一部字幕機畀佢對住嚟唱，不過現場班老友記都已經睇到拍晒手掌。四太謙稱，平時冇操曲，佢比較熟嘅粵曲都只得兩首，一首係《香夭》，另一首就係《紫釵記之劍合釵圓》。
今次並非四太首次開金口，佢今年5月以保良局主席身份出席保良局一個慈善晚會，就首度粉墨登場客串演出鳴芝聲劇目《搶新娘》。佢仲係香港粵樂曲藝總會榮譽會長㖭。以前，大家只知四太跳舞耍家，當初就係跟賭王一舞定情，唔知佢唱粵曲都掂，唔通都係用嚟𠱁賭王？
15歲超欣 素顏look現身
賭王四太梁安琪前晚帶埋細女何超欣出席金利豐（1031）老闆朱李月華喺鴨脷洲搞嘅盆菜晚宴。今年15歲嘅何超欣，亭亭玉立，樣貌越大越標緻，難怪佢爸爸曾經大讚過佢「靚到不得了」。
雖然貴為賭王千金，但超欣呢晚打扮得非常樸素，簡單着件A&F灰色冷衫，襯條深藍色牛仔褲，再戴副黑框眼鏡，成個《IQ博士》入面嘅小雲咁可愛，青春真係無敵。
怕怕醜醜嘅超欣成晚都黐住喺張枱到食盆菜，但當四太上台表演唱粵曲嘅時候，超欣就走到去台前面，拎起部土豪金版iPhone5s錄足全程，唔知係咪要拍番條片畀賭王睇呢？
李華華
mailto:[email protected]
