已經啟程去咗日內瓦準備出席聯合國會議講番人大政改落閘決定嘅民主黨主席劉慧卿，上周六下晝去髮廊恤個靚髮先出發。一位同樣幫襯髮廊嘅反佔中市民，趁卿姐離開髮廊時刻意攔路「禁錮」，仲邊鬧邊拍短片放上YouTube，似乎想畀大家一睹「攔路嬸」嘅風采！
從短片玻璃反射嘅影像可見，呢位反佔中嘅攔路嬸，揸住部手機影住卿姐兼阻住佢離開（圖）。攔路嬸聲大大話呀，香港好多人都要搵食㗎，而家俾佔領者阻住，質疑卿姐：「你扮咁靚做咩呢？」同時一輪嘴大爆發挑機：「啲人企20多日，你又唔企？你嚟洗頭，整咁靚做咩呢？你扮咁靚做咩呢？真係荒謬。」
向來堅持和理非非嘅卿姐，面對無理挑機一直不發一言。身在日內瓦嘅卿姐同八方講，呢位反佔中女士明顯對於佔領行動好唔高興，當時唔想同佢爭辯，咪由得佢鬧，幾分鐘之後，女士終於收聲兼收手，佢先可以全身而退。