【壹週刊】本地靚女產品設計師及插畫師鄧卓越，花約七十萬、裝修了半年、位於中西區的七百多呎單位，由大門入口至客飯廳兩旁，都用橡木做了一排入牆櫃，用來收納文件和顏料等，鄧卓越（Dorophy）說：「用木櫃做咗好多收納地方，可以令環境比較簡潔，無咁多立雜嘢。」
近睡房那邊的牆身及房門則以白色為主，和對面的橡木牆形成對比，亦巧妙地以白色和木色分隔了客飯廳和寢室兩個區域。
單位的室內裝修由她及從事創作的丈夫共同設計，「大型傢俬就大家有共識。」但廚房就交由Dorophy話事。她家中有不少盆栽，「一來可以令個地方有生氣，畫到攰都可以望吓綠色植物，但因為我好多時都要出trip，所以會揀一啲比較容易打理嘅植物，譬如黃金葛。」
位置上，她喜歡搵個近市區又可以近大自然的地方，「呢度大約用半小時就可以行到上太平山，得閒可以行吓山幾舒服，平時我哋都係行落去港鐵站，行多啲路做多啲運動。」
Dorophy做得設計，腦裡應該充滿不同的裝修草圖，她之前想過鋪水泥地走raw路線，「但最後都係想效果warm啲，所以用多啲木元素。」而水泥地其實亦有不便，「之前屋企都試過水泥地，但好難keep，因為我唔想佢太『令』，無做coating，喺上面就容易吸塵，赤腳就無咁方便。」
主人套房沿用暖系木色，而最近Dorophy為HomeSquare正舉行的「睡•訪燈飾寢具展」輯錄了她的「寢室密語」，分享到她鍾意用白色床單，「因為細個會成日幻想喺雲上面瞓覺，所以到依家都覺得特別舒服。」她亦喜歡床頭放一本記事簿，方便睡前創作，「瞓覺前無咩做，個人relax咗，反而嗰段時間特別多唔同諗法，我諗到啲嘢就記低佢，就可以安心瞓覺。」而每到一處地方，她也喜歡留意當地的雲，「奧地利日落嘅雲會變做粉紅色，加拿大日落嘅雲係橙黃色，雲俾人感覺好多可塑性，幻想喺雲上面好舒服、軟綿綿。」問她會否兼做室內設計師？「唔得，嗰個一定係好專業，會計好多數，可能我業餘做傢俬設計，但室內設計可能同人合作先得。」
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁
http://nextplus.nextmedia.com/