佔中發生後，建制派輪流出來批評示威者，剩係識叫學生讓步，假普選就隻字不提，聽得多真係好煩。而較開明嘅范徐麗泰，向來較溫和人緣較好，但大陸主旋律之下，早排又係講啲外國勢力介入之類，佔中梗係拆唔掂啦，其實范太想贏得公眾掌聲，倒不如退福地跑馬地馬場！
范太係馬會大董，佢名下嘅「自成一格」前季喺谷草1650米三連捷，幫過唔少馬迷贏錢，曾經係好多人嘅愛駒，可以話跑馬地馬場係范太嘅福地。
上季「自成一格」因為評分偏高，跑咗14場，最叻只得一席亞軍，表面有啲退步，但輸足一季減咗好多分，家陣喺四班都唔使孭重磅，當然又回復競爭力啦。上仗隻馬季內初出，響盲門沙田都只輸兩身位，睇得出狀態起得唔錯，拼後13屆冠軍騎師韋達唔放手，今仗回師最強嘅谷草一哩，埋門彈草閘準備充足，抽埋個二檔，范太想攞采，都係馬場適合佢多啲！