以往好鍾意入場睇跑馬，嗌馬嗌到好激嘅女馬主曾向欣，自從早排榮升媽媽後，喺馬場出現嘅次數銳減，就算老竇曾炳威嘅「威祥」上季尾兩捷，欣欣都冇拉頭馬。梗係啦，初為人母，有乜嘢比BB更重要。
不過今次賽事就唔同講法，因為欣欣另外兩個「囝囝」一次過出場，所講嘅係一對名下馬「悅欣賞」同「喜欣賞」，明顯係練馬師沈集成經過精心部署，欣欣當然唔可以錯過。
先講「悅欣賞」，上季最後一戰力拼取勝，走勢有前有後，遲熟馬大有進步，今季一早開操，操咗近三個月，特登等谷草重開，有勝途谷草1200米先復出，擺明決心一出即拼，本月10號更試埋谷草大閘，一放而返，表現充滿鬥心及新鮮感，由當旺嘅首席華將何澤堯操刀，人馬都充滿實力！至於「喜欣賞」，上仗沙田熱身戰走勢一般，但今次跑番曾兩捷最擅長嘅谷草1800米，有一定冷門機會，如果一對寶貝仔起到個孖，咁欣欣就真係媽媽真的愛你咯！