【雨傘革命 第22天】
【本報訊】特區政府近日發動抹黑佔領行動攻勢，獲頒大紫荊勳章的星島新聞集團主席何柱國昨日點名批評學聯秘書長周永康，指他們不能代表港人，又斥責學生對社會「冇貢獻」，恐嚇佔領會釀成失業潮，更揚言若他是警方的話，「我一早已經清（場）」。泛民議員批評何不斷製造恐慌、助紂為虐，打壓尋求和平對話的學生。
記者：呂浩然
特區政府昨舉行授勳儀式，按慣例原本於10.1中共建政日舉行，但因佔中而押後。獲頒大紫荊勳章的何柱國，於2011年特首選舉期間曾狙擊梁振英，但梁當選後即變身「梁粉」，他昨日出席頒授典禮後，即炮轟佔中及抹黑學生，「噚日（前日）有學生出嚟，佢話我哋出嚟做佔中爭取民主，我代表香港人。佢唔代表我，佢都唔代表好多香港人」，又指周永康不能代表港人，「周永康去到旺角都唔代表旺角」。
何又指佔中令香港「內傷」，「遲一啲你就可以見到失業潮，同埋有啲舖頭會關閉，𠵱家你睇唔到㗎，一兩個月就可以睇到」。更狠批青年對香港「冇貢獻」，「你哋今日冇付出到乜嘢，你今日去讀書，係我哋養你，嗰條路係我哋鋪畀你，個地鐵係我哋鋪畀你，你到今日對社會冇一個貢獻，所有嘅貢獻係以前嘅人工作好勤力咁去今日行出嚟」。
「話遮唔係武器係多餘嘅」
對於警方出動87枚催淚彈鎮壓，何稱初也覺得「需唔需要呀？咁激？」但看過網上影片後，認為示威者其實並不和平，「話遮唔係武器係多餘嘅，你見到佢哋舉高隻手話和平示威，下面踢、搵遮篤」，揚言若他是警方，「我一早已經清（場）㗎喇」。
此外，他咬定佔領背後有組織，「後來你見到佢有水、有眼鏡、面罩、工業面具同埋雨遮、膠紙，不停嘅供應，個supply仲好過警察嘅，呢個唔係有組織，一早預謀嘅係乜嘢呢？」，又稱要求梁振英下台和人大撤回決定兩大訴求絕不會發生，「（梁振英）冇呢個權答應你」，故學生應「收手」，否則會有悲劇發生。
公民黨陳家洛批評何柱國，甫獲頒勳章即「撲出嚟凶神惡煞批評正在尋求對話嘅學生，係想幫梁振英搗亂定係玩香港人？」認為何的言論是「助紂為虐」、「製造恐慌」，強調何作為既得利益者，本應該履行社會責任，呼籲市民透過對話解決問題並幫忙解決社會問題。