識肥通嘅朋友都知我係模型高手高高手！今個星期有朋友請教我，figure玩具甩色有冇得救，方法當然有！價錢亦唔算貴，只要噴番模型油就得喇，我哋今日搵嚟模型店老闆陳健惠（Henry）作示範；點解唔係我肥通披甲上陣？因為我仲有個朵叫「唔砌齋啪老婆斬跛手」嘛。
撰文：肥通
攝影：陳永威
香港多人玩figure，相信Hot Toys嘅Iron Man同Bandai嘅聖鬥士系列，都係唔少人飾櫃中嘅最愛；雖然佢哋係完全唔同廠出品，不過都有一個通病，就係軟膠部份會出現甩色問題，Henry：「原身的軟膠位上色，已經同其他硬膠及金屬位唔同，有些人以為放飾櫃，由於燈光或陽光照射會令軟膠部份褪色，其實並不盡然，有朋友的figure從未開封但同樣會面對這個問題，這可能是軟膠上色部件出現『索色』，即色彩滲入了軟膠內部。」其實拯救它們的方法，同一般模型噴上「金屬色」差不多，只要家有噴槍，就可以自己補救。
復原！童虎淡金聖衣
今次第一位示範嘉賓，請來聖鬥士聖衣神話EX天秤座童虎，留意其手掌部份已甩色變成淡金色，出問題的是軟膠部份；金色在模型上一向較難表達，而且相對顏色變化亦較大，加上還有手指的肉色部份，相對操作上會更困難。
1.在不噴色的部份，先塗上Masking Coat，預防塗出界。
2.待Masking Coat完全乾透，再噴上multi primer。
3.噴上ultimate black，待乾。
4.噴上star bright silver，待乾。
5.在所有上色位置均勻噴一層透明黃，再在手指夾位位置噴上透明橙。
肥通點評
Masking Coat在冷氣環境下，可能要近1小時才乾透；但之後可以像乾透的白膠漿一樣，乾淨的褪下。這次DIY的重點，是少量的透明橙，如果以模型人講法，就是類似噴陰影的手法，少量的噴上，會有一種金中泛橙的感覺；但如果噴太多，就會變成金屬橙色，完全是兩碼子事。
復原!褪色鐵甲底褲
這隻戰損版Iron Man 2 MARK VI，是未開箱的全新品，不過留意「底褲」位置已經有褪色問題；以往軟膠上色會十分困難，因為所上顏色可能會有馬上爆裂問題，不過隨着模型技術的改進，這些問題已得到解決──就是今次使用的gaia multi primer，學名「多用途底油」，不過模型行內人稱軟膠救星，不需要任何稀釋，直接噴在模型及figure表面，之後再噴油性顏色，就會變得富有彈性不易爆裂了。
1.先用2,000號砂紙，在褪色表面稍作打磨。
2.用gaia multi primer作底漆，待其乾透。
3.均勻地噴上光澤黑在上色的表面，待乾透。
4.再噴上一層星閃銀，這時會看出強烈金屬質感。
5.最後噴上4至5層透明紅，待其完全飽和即完成。
肥通點評
在噴色時，要一直與身體原色作比對！gaia這款混合金屬紅，一般情況下會較Iron Man的原色鮮艷，這時要逐滴將ultimate black加入噴槍中，調校顏色更貼近原色。
RX88 HOBBY
旺角快富街37B地舖