香港警隊嘅形象低處未算低，唔少市民慨嘆，唔係經過今次佔領運動，都唔知道部份警察行徑如此令人吃驚，可以隨便向冇反抗能力嘅示威者動用私刑。有網民就做咗個網上人肉搜尋器，叫「香港警察表揚資料庫」，只需要輸入警員編號，就可以即刻搵到對方嘅姓名、職級。
有高登仔話，以後喺示威現場如果見到有警察濫權，隨便打人、或者冇警告就亂噴胡椒噴霧，只要即刻輸入對方嘅警員編號，對方身份就無所遁形。其實呢啲資料唔係內部機密，全部都係曾經刊憲公佈獲表揚嘅警務人員，唔少市民質疑咁做洩露私隱，認為私隱署要做嘢，不過網頁似乎已經俾人鏟走咗。