民建聯議員梁志祥前日發表國際傳媒都恥笑的膠論，用黃飛鴻電影「證明」雨遮「喺民國時代是攻擊性武器」後，噚日白鴿黨議員單仲偕喺立法會復會時扮「真心膠」，問立法會主席曾鈺成，立法會有冇禁止帶遮呢種「攻擊性武器」出席會議。
單雞就擺明玩民記同梁志祥，但梁嘅黨友Tree根鍾樹根即時中伏，話同意遮係「攻擊武器」，要求曾主席勒令泛民議員將全部遮帶離議事廳。阿曾眼見黨友中伏，即時話議員展示嘅物品，只要同會議處理事項直接有關又唔妨礙其他議員，就可以展示，表明唔會要求議員移離雨傘。
不過Tree根繼續要求主席解釋把遮同佔中有乜關係，主席就睬佢都儍，話泛民展示嘅物品未有違返議事規則，再順勢鬧埋前日復會後，議員單係點人數已用咗兩個鐘頭零40分鐘，呼籲議員珍惜時間。
可惜Tree根仍死唔斷氣，公民黨Miss Mo發言時笑佢連遮同佔中有乜關係都唔知時，突然無視議事規則，喺位內大嗌表達不滿，結果激嬲阿曾，被斥「唔係你發言時間，請你保時肅靜」。