梁振英收四百萬鎊一事，究竟係誰人放料，被澳洲記者形容為「從天而降」？中國資深中國觀察家林和立就推斷係中國國安部與中共組織部，呢兩個部門一定有百分百齊全嘅「梁振英檔案」資料，但點解要放料？點解要放俾澳洲報紙，點解要在佔中高𥧌期發放，就幾難掌握真相。林和立（蘋果評論版，十月十三日）推測係梁振英嘅特首日子已進入倒數階段，放料人別有用意。
林和立之言，是否可信，有排拗，至少梁振英在十月十三日在廣州仍然嘴硬，佢不會亦不需要辭職，但能否在2017年連任呢？佢當然唔敢講住，梁之最大威脅，葉劉淑儀呢排意見多多，既力撐警察放催淚彈，數佔領運動不是，同時亦對梁振英冇乜好評語，分明係想向中央傳遞信息，我願意一試，我已準備好！
風頭火勢，中央唔會俾梁振英喺呢個時候鬆人嘅，否則就會好冇面，在十月十六日就在星島日報見到「反梁如反中央」之建制派傳言。中國領導人素來要面，中國政府又要面，為了公開風光的面子，情願暗地裏鬆章俾談判對手一啲甜頭，故此非洲國家猛從中國攞着數。金融時報（十月四日）嘅"Lunch with FT"專訪，與巴西哲學家、思想家，又曾經做過巴西策略事務部長嘅Roberto Unger對談，呢位先生係天才型，1976年時只有29歲就成為哈佛終身教授，英國工黨黨魁文立彬視之為師。Unger教授在訪問中提及佢擔任部長之時，不時與印度、中國、俄羅斯開「金磚四國會議」，佢話中國啲部長講話甜絲絲，甜到膩（繙譯：好話講盡），有一次中國建議召開一個金磚四國NGO高𥧌會，中國嘅NGO代表會係中國共產黨！Unger視之為天大笑話。Unger呢個故事即係話中國愛面子，大家肯合作肯捧場就萬事有商量，唔肯合作又點？咪視之為敵我矛盾囉，近日報紙報導大陸禁止出版銷售余英時、梁文道、九把刀等人嘅書本，原因係佢地支持香港佔中及台灣太陽花，恕左丁山唔知九把刀係邊一位，未讀過佢嘅書，但余英時係國際著名學者，學術著作深不可測，十三億人之中，冇十萬人睇得懂，咁都要禁？梁文道係中大90年代畢業生，讀書多，但為文又長又複雜，年青人未必有興趣，又要禁？原因只有一個嘅啫，佢地唔俾面，唔聽話兼且懂得獨立思想吖嗎！