【亞視風雲】近日盛傳亞視賣盤，又拖欠員工薪金，令一眾打工仔士氣低落，有人擔心藝員及幕後人員生計，有幕後甚至開始罷工，然而一班幕前藝員卻似乎仍然落力演出，秉承「The Show Must Go On」的精神。說到底全因不少亞視藝員原來是隱形富豪，個個打風流工，才不管那7,000元底薪是否有過數，在台上我覓理想，一台獨大之下的演藝夢，只能在這個瀕危的細台去完成。
撰文：楊潔雯
涂諾：份糧唔夠我養車
或許沒有太多人知道涂諾是誰，但在亞視人人知道他有個花名叫「揸林寶嗰個」，只因11年他開了一架蛋黃色的林寶堅尼到亞視總台面試亞洲先生。無論是褒是貶，涂諾照單全收，訪問當日他沒有揸林寶，改揸新買約400萬元賓利跑車到大埔工業村，不是要晒命，但這確實是他的日常生活：「機緣巧合，入電視台好難，平常人接觸呢個圈好難，咁難得有比賽，有呢個機會，趁後生咪試吓，覺得唔啱自己咪返去，我比其他人係多咗啲條件，其他人係為搵食，咁我有呢個機會點解唔試下。」
家中獨子的涂諾，家族主理塑膠國際貿易，亞視冇糧出，他不知道，他說：「對我嚟講真係唔係好有影響，我都唔知道，從來我都唔睇我啲人工有幾多，我好少喺香港使錢，嚴格嚟講，我份人工又唔算好低，不過打多幾份工都唔夠我養車，做呢行冇諗住有乜回報，諗回報唔會做artists，好多artists都要捱好多年，無論生活、情緒，要煎熬好耐先有好成績。雖然呢份工收入唔係佔我好大部份，但係時間花喺呢度係最多，多過返我自己公司，咁基本上屋企生意做咗好多年，都好穩定，上咗軌道都幾好。」
做藝員除懶筋
富二代涂諾，全部名貴跑車、開篷車、房車都開過，家住深圳過萬呎豪宅，在亞視打工是為理想？他說：「算係喇！唔好話收入幾多，學到嘅嘢係錢買唔到，因為我屋企做生意，話我做少爺仔都好，基本上我係幾懶，每日返工3、4個鐘，返到去簽個紙，瞓到黃朝百晏，真係好多人渴望嘅生活，以前生活係咁，唔係頹廢，只係唔忙，冇乜壓力。嚟咗亞洲電視之後就唔同咗，我7點起身，阿媽問我點解咁早起身，咁我9點鐘要拍嘢，唔似我公司做嘅嘢，我唔想開會我就拖喇！安排到下晝，𠵱家有演員道德，我應承得就要做，提前到背好晒啲稿，以前背稿壓力好大。成班人望住你話『喂喂喂！揸林寶嗰個』自己都好冇面，好多人嚟到唔識我，但係知我揸林寶，頭一年都係叫『揸林寶嗰個過嚟喇』。要面，人哋對你有期望，逼吓逼吓就可以，真係幫到自己。我阿媽話我自己攞嚟搞，咁冇人逼我咪自己逼下自己，𠵱家令到屋企人對我有信心，知道我都可以為自己鍾意嘅嘢咁努力。」
筱靖：阿爺係酵母之父
筱靖07年選亞姐，待在亞視7年，維持7,000元底薪，何苦來由？她說：「我喺廣州出世，十幾歲過加拿大，不嬲嚮往香港呢個地方，首要成為香港人。」筱靜明年終於等到渴望已久的三粒星，持續7年低薪，她怎樣生活？筱靖說：「我自己堅決要留喺香港，自己要留就自己搞掂，無奈我係搞唔掂，做藝人要好多投資，到𠵱家佢哋知藝人付出幾多唔等如可以收穫幾多，但係付出一定要，衫褲鞋襪化妝整頭，就算我間屋、架車呀！我自問真係無能力，要爹哋媽咪support自己，要屋企支持。」
筱請80歲爺爺是內地酵母之父陳培，家族做食品原料生意，筱靖於香港自設糕餅代理公司做CEO，難怪她可以撐到今時今日，原來又是禾稈冚珍珠，她說：「我爺爺係酵母引進之父，將酵母同埋cream，引入去中國係第一個人，喺法國引入去中國。我嘅成就點努力都高唔過佢，我冇呢個奢望去冚過爺爺，𠵱家佢又退休，佢覺得我係一個發夢嘅人，我又唔係發明星夢想做明星，我𠵱家做主持有人認同欣賞，咁既然屋企又唔使我養，我咪去做我想做嘅事囉。」
張家瑩千萬投資兩餐廳
同樣是07年亞姐，冠軍的張家瑩對亞視不離不棄，曾經離開卻又回來，全因為對幕前仍然留戀，她說：「自己屋企係做生意，屋企係做建築，爸爸對娛樂圈唔係好認識，擔心娛樂圈照顧唔到我，有叫我不如返屋企，等爸爸保護，我讀咁多書，喺大學讀數學，點解讀完大學唔做會計，行一條平穩嘅路，但係我發現娛樂圈係我最鍾意嘅嘢，我鍾意拍嘢，鍾意周圍去，亞洲電視畀呢個機會我。」
在亞視主力擔任旅遊和飲食節目主持的張家瑩，累積了多年經驗，在兩個月前，投資接近8位數字在銅鑼灣開設兩間高級食肆，她說：「我做咗一間日本餐廳，另外一間泰國餐廳，好似好犀利咁，其實本來係一間餐廳，要決定時候我就將佢斬開一半，啲人上到嚟有另外一個選擇，咪以為我做老闆娘坐喺度，我都會幫手，好細微嘅嘢我都會做，我都會燒牛肉畀客食，做餐廳其中一個目標係想見多啲人，識多啲嘢！喺呢個方向同目標去做。」亞視可否續牌，乃未知之數，所以家瑩將全副心機放在餐廳上，她說：「我希望一年內回本，諗過會唔會擴張落去，睇下會唔會再開，想創造一個自己品牌。」
蔡國威做主持有車有樓
蔡國威在亞視做了19年，在《香港有飯開》食即食麵食到街知巷聞，做《六合彩》做到封六合彩之子，如今亞視搞到如斯境地，威仔百感交集，他說：「見到好多人出出入入喇！有啲一去不返，有啲去咗隔籬台，我自己冇走過，可能同我嘅性格有關，由細到大都係一個幾穩陣，幾安定嘅一個人，唔鍾意郁，咁所以就留咗19年咁耐囉！」
威仔累積十幾年司儀和主持經驗，在司儀界有市有價，年近歲晚司儀騷更加接到停不到手，他說：「咁我都唔會係唔係都接，太低真係接唔落手，咁做咗亞視咁多年，累積咁多經驗，都係多得客戶畀面。」威仔不是富家子弟，單憑自己的努力，都可以有樓有車養小狗，真是難能可貴。
秦啟維獨家代理英耳機
20年元老秦啟維，在亞視平穩度過，不過中年危機，令他發奮自強，他說：「我表哥本身係開廠做耳機，有代理好多牌子，因為佢係生產商，最近喺歐洲好流行一隻英國的耳機牌子叫BASSBUDS，咁啱又搵我哋做大陸香港市場，傾咗全東南亞獨家代理。」
學做生意，要講求謀略，代理的第二代耳機跟英超球隊合作乘今年的足球熱，令秦啟維認為是進軍的好時機，他說：「第一代耳機係用唔同swarovski水晶，第二代會同啲國際球隊合作，好似英超利物浦或者曼城，𠵱家耳機已經係一種fashion，我就係睇中呢個市場潛力！」
【個個有米】亞姐家底厚
亞視隱世富豪多的是，大部份更曾參選亞姐，有的本身家有富爸爸，也有嫁個有錢人的例子。
朱慧珊（85年亞姐）
當年獲豬肉獎和平小姐名銜，在亞視任主持多年，08年再嫁予賈姓商人，據知賈先生是政協，同時是隱形富豪。
韓燕（06亞姐季軍）
拍過幾個旅遊節目，早年嫁給海南電視台的台長，誕下孖胎。
姚嘉雯（08年亞姐冠軍）
本身家勢顯赫，是官二代，12年與李姓商人註冊結婚誕下女兒，丈夫是西安商人，做房地產生意，家底豐厚。
許瑩（09年亞姐冠軍）
11年嫁圈外有米男友鄭曉東，深圳有幾間酒店。據聞鄭曉東是內地太子黨，家人都是有權有勢官員。
劉曉智（10年亞姐季軍）
舞蹈家出身，早年嫁給一個北京舖王，據聞北京有一條街的舖頭都是劉的老公。
房星彤（13年亞姐冠軍）
據知房的爸爸是一名有錢、有地位的內地官員。