【雨傘革命】無懼內地封殺、無視影響收入，作為一位極具份量的藝人，葉德嫻（Deanie）終於挺身而出，前晚身繫黃絲帶盛裝出席在中環舉行的首飾活動後，晚上再素顏走入金鐘佔領區撐學生和市民，又為黃耀明及何韻詩打氣。早前有份參與錄唱《撐起雨傘》的Deanie姐，坦言佔中令她想起六四，戴黃絲帶是要表明立場，她說：「我都好希望自己可以做到啲嘢，不過好可惜同慚愧，我自己做得唔多，希望政府可以有少少讓步。」
轟政府亂扣帽子
有多少藝人為自保而選擇噤聲？表明立場的Deanie姐卻自稱慚愧，不過她亦笑說：「我哋都係唔好答呢啲嘢，𠵱家答好似好危險。」但晚上10時半，當阿詩與明哥在金鐘政總主台獻唱《撐起雨傘》後返回「文化監暴」大本營時，一身便服兼素顏的Deanie姐就突然現身，她用手機反拍正在採訪的記者，笑說：「影低呢個畫面先。」問她來到現場有何感受？Deanie姐說：「同一班小朋友講，要佢哋沉住氣，欲加之罪，何患之有，對方要扣你帽子，連麥當勞都唔畀食，話係外國勢力，要扣帽子就畀佢扣，千祈唔好嬲，堅持自己信念，雖然最後可能都爭取唔到啲乜，大吉利是！」
明哥與阿詩邀請她唱《撐起雨傘》，Deanie姐二話不說就答應了：「我只識唱歌，佢哋咁好邀請我，梗係答應啦！如果唔係我自己都想唱首歌。」此外，明哥表示認同黃之鋒所言，叫大家繼續堅持落去；阿詩則說：「其實一個人加上一個人，咁就會係一個力量。」
採訪：馬建華、盧妹
攝影：陳俊強、陳志嵐
