【時代廣場】呢排娛樂圈成日傳出藝人同邊個分手、邊個離婚，似乎令人覺得感情呢樣嘢好兒戲，不過世事無絕對，喺呢個圈都仲有好多恩愛夫婦。好以結咗婚20年嘅曾江同焦姣，雖然成日有報道話曾江好大男人兼有脾氣，但係喺太太焦姣面前，大男人都有柔情嘅時候。
行勻檔攤試食
前日傍晚6點幾，曾江同焦姣兩公婆齊齊現身銅鑼灣時代廣場嘅city'super，門口個展銷場做緊日本食品節，揹住背囊滿頭白髮嘅曾江，拎住個購物籃行勻每一個攤位，佢哋仲老實唔客氣咁邊行邊試食，其間見佢哋有傾有講，似乎係交流吓試食心得，結果佢哋買咗幾包類以烏冬嘅物體，不過拎嘢嘅重任都係由焦姣負責，之後佢哋齊齊行去的士站搭車走人，雖然唔見佢哋有乜嘢親密舉動，但係一直雞啄唔斷講唔停，嗰啲老夫老妻嘅感覺走晒出嚟，真係羨慕死人喇！
石修睇戲買包
【圓方】另一對恩愛夫婦石修同太太，噚日下晝都喺圓方出現，佢哋先喺戲院買飛睇戲，散咗場之後，佢哋行咗去超市買嘢，點知揀揀吓石修行咗出去講電話，講完見佢行番入去會合太太，佢哋今次主攻生果同麵包，仲好細心咁研究吓啲麵包有乜嘢成份，食得真係健康，畀完錢之後，石修自己一個人去咗搞泊車優惠，跟住再去停車場攞車。
採訪：徐錦池、羅德光
攝影：楊浩賢、梁繼光
