愛美係女人嘅天性，就算要去佔領，都要靚到盡；所以一班女佔領者心口有個勇字之時，都要由頭到腳俾人睇到個「靚」字！話說連日喺唔同嘅佔領地，幾乎都有扮靚區；由修眉到敷面膜以至美甲，樣樣做到足，公廁亦變身化妝間，齊齊佔中變靚啲！
十指畫滿黃絲帶
靚女叫做美眉，可見條眉幾咁重要。讀緊城大創意媒體系三年級嘅Jane對此好理解，已經喺添美道留守19日嘅佢，噚日喺佔鐘現場為佔領者提供免費修眉服務。佢話見到在場同學佔領多日後，「佢哋啲眉毛都長咗好多，眉都冇得修」，決定擺檔幫人修眉扮靚，略盡綿力貢獻一番。同場亦有佔領美眉當眾敷面，作戰係重要，但護膚都絕不能缺少！
而喺佔旺地區，則有女佔領者以指甲起革命。大專女生張同學經歷過10月3日黑勢力衝擊旺角，俾惡人喝令除下黃絲帶敗逃嘅狼狽場面，返屋企後心有不甘，決定將10隻手指甲髹上黑色，再喺上面畫上黃絲帶，咁樣就唔會再怕有人要佢除黃絲帶，隨時掀起一番美甲抗爭浪潮！
原來佢每日晏晝4點半放學後，都會去旺角集會區留守，仲喺匯豐銀行玻璃牆用告示貼寫下「香港人加油」等字樣為佔領者打氣！
李八方
mailto:[email protected]
