梁振英收澳洲UGL四百萬鎊顧問費，分兩次收，一次係上任做特首之後，確實令人搖頭，成為中環人熱烈討論話題。不少中環人，以左丁山視察所得，起碼有五至六成反對佔中，認為學生示威，應適可而止，就如艾爾敦寫網誌所講：Enough is Enough，但年青人是否願意聽從老人家之言，係一個大疑問。1960年代中期興起嬉皮士運動，巴黎街頭擲石頭，柏克萊校園點火，哥倫比亞大學校園騷亂，那些年，30歲就係老人家，全部可殺或應自殺。當年第一批嬉皮士，今年已年近七十，自然老過30歲好多，佢地之中，不少成為教授、學者、有錢生意人，佢地講嘅說話，今天之17歲人，幾難聽得入耳，是故陳日君之言，有人當作耳邊風。
中環人雖然對學生繼續封路，騷擾日常生活，不以為然，但佢地對梁振英之「性好辯」，死都要講返生嘅作風，絕無好感。梁振英講到收四百萬英鎊於法律及道德上絕無問題，真係令佢啲擁躉都氣頂，如果佢真係有道德情操嘅，理應在2012年3月競選成功，知道將會在七月一日就任為香港行政長官之後，立即搵律師寫信俾UGL，將份服務協議撤銷，不收第二期款項，先至夠光明磊落。理由好明顯，因為做咗香港特首之後，佢絕無可能履行合約，為UGL提供任何服務，既然係咁，仲要收UGL嘅錢？仲好意思收錢不做事？而若然做事又會產生利益衝突？
偏偏梁振英要調轉嚟講：「收錢之後，冇為對方做任何事，故此冇利益衝突！」問你服未，難怪一位退休賓架對左丁山講：「商人從政，講到錢就係死門，收錢係商人嘅DNA，有人送錢上門，會唔會Say No呀？」或者如獅子山學會皮蛋王所言，唐英年就會唔收嘅，因為唐唐啲藏酒已經唔止值四百萬英鎊。收完錢駛唔駛交稅，又係中環人爭論要點。梁振英好似講佢屋企僭建咁，話已經問過專業意見，唔駛交稅，又係搵嚟講，啲稅務律師／會計師永遠唔會俾百分之一百肯定嘅意見，只係會講出不用交稅之理據及不交稅之可能風險有幾大或幾細，最後決定由當事人拍板，即使唔交稅嘅風險低，梁振英應要考慮到佢身為香港特首，就完全不應樹立一個不交稅嘅壞榜樣。講到尾，佢係講法律技術，唔講道德之人。