佔中活動未收科，社會氣氛麻麻，金融界長跑達人──恒生銀行（011）傳訊及可持續發展總監張樹槐（水哥），啱啱過去呢個星期日就離港幾日，首次遠征芝加哥呢個世界六大馬拉松賽道，享受芝城「全城皆馬」嘅動感。
水哥透露，完成芝馬後，全球六大馬嘅賽事中，佢已經跑咗五項，僅餘東京賽道，佢預計明年2月出戰東京，到時就可以達成跑晒六大馬嘅心願。
水哥信奉基督，百無禁忌，曾經話人生最浪漫嘅句號，就係喺馬拉松賽道劃上，即係「跑緊步嘅時候死」；相信以佢愛跑如命嘅性格，即使完成六大馬後，仍會繼續跑落去。
講番芝馬賽事，每次舉辦都丁財兩旺，賽道環繞唐人街29個區，過百萬市民夾道打氣，每名跑手經過，途人雖互不相識，但都會高呼跑手T恤上嘅名字，尤如粉絲見到偶像一樣激動。