足球係世界最受歡迎嘅運動，一場頂級球賽全球直播，係示威抗議嘅好方法。無論係抗議班主或者領隊，定係國家元首或政府，直播嘅鏡頭可以將示威者嘅聲音帶到全世界。
最近有「大阿爾巴尼亞」旗幟喺塞爾維亞對阿爾巴尼亞場波飄揚，但結果搞到球迷騷亂；至於近年最紅嘅應該係曼聯球迷，租架飛機叫莫耶斯下台，喺奧脫福上空飛過，全世界都知。至於香港最近都識用比賽去示威，好似傑志對阿比爾嗰場亞協盃4強次回合、香港對新加坡同阿根廷兩場國際賽，球迷開遮、拍掌等支持佔中。
喺球場上宣示政治訴求嘅點止香港人，但人哋嘅下場就慘得多，嗌吓口號都要坐監；喺上星期白俄羅斯主場對烏克蘭嘅歐國外，雙方球迷不斷高歌、辱罵，但針對嘅唔係對方，而係大家一條心鬧臭俄羅斯總統普京。白俄球迷整首《Glory to Ukraine》，先唱為敬，之後到烏克蘭球迷唱《Long live Belarus》回應。普京確實厲害，以一己之力團結到兩個國家嘅球迷。不過，白俄總統盧卡申科出名專制，舊年佢仲因為禁止公眾地方拍掌而獲得搞笑諾貝爾和平獎；佢本身係親俄，見到咁大班人鬧普京，賽後即做嘢，拉咗約100個烏克蘭球迷，同30個白俄球迷，其中有烏克蘭球迷被告講粗口，坐咗幾日監。言論自由唔係必然，身在福中要知福，守衞呢份難得嘅自由。
文：咖喱